வெட்கத்தில் கொட்டிக்கிடக்கின்றது...

நீ விட்டுச்சென்ற வெட்கத்தில்
கொட்டிக்கிடக்கின்றது மிச்சம் ...
உன் வெட்கத்திற்கும்
நம் மௌனத்திற்கும்
குழந்தையாய் பிறக்கின்றது
உன் இதழோரம் சிறு புன்னகை ...

அலைகளுடன் !

இணைவது தெரியாமல்
நதியும் பயணிக்கிறது
கடலும் காத்திருக்கின்றது ...

அலைகளுடன் !

வாழிடம் தேடி

தூண்டியவன் துயில் கொள்கிறான்
தூண்டப்பட்டவன் துக்கம் செய்கிறான்

தடையின்றி பயணிக்கிறது ஆக்கபூர்வமான
மனிதவளம் அழிவுப்பாதையில் ...

உணர்வுகளின் விளையாட்டில்
உயிர் தோற்கிறது
உரிமைகள் மீறப்படுகின்றது ...

சிந்திய உதிரமும் சிறுநொடியில்
மண்ணில் கலந்து தின்மமாகின்றது
வன்முறையின் நிறமும் சிகப்பு ...

இயன்றவன் இறையாண்மை பேசுகிறான்
இயலாதவன் அரசியல் பேசுகிறான்
பாவப்பட்ட மனிதமோ பல்லக்கில்
பயணிக்கிறது பாதாளத்தில் விழ ...

வடக்கும் தெற்கும்
கிழக்கும் மேற்கும்
திசையின்றி பயணிக்கிறது
வன்முறையற்ற வாழிடம் தேடி !

பெண்வாசம்

காற்றில் அசைந்தாடும்
கொடியும் மௌனம் மீட்டுகிறது
உன் துப்பட்டா
அதன் மேல் விழுந்ததால் ...
பெண்வாசம் சுவாசிக்க ...

நீ பிரசவத்திற்காக
உன் அம்மா வீட்டில் ...

உன்னுடன் நான் தினமும்
குளிக்கிறேன் !

குளியலறை சுவற்றில் நீ ஒட்டிய
உன் நெற்றிப் பொட்டுடன் ...

நித்திரையற்ற கனவுகளும்
நிஜமற்ற நினைவுகளும்
பொய் கூறா கவிதைகளும்
ஊடல்லற்ற காதலும்
இனிப்பற்ற சர்க்கரையும் போல்
நீயற்ற நம் வீடு ....

வந்தார்கள் பார்த்தார்கள் சென்றார்கள் ...

வசைகளுடன் கூடிய
அரைநாள் விடுப்பு
அடகு கடையில் மீட்டுவந்த நகை
பச்சைப்பட்டு...பருக்கள் மறைக்க
சிறிதாய் முகப்பூச்சு ...

தினசரி நாள்காட்டியில் அவள்
ராசிக்கு நேரே முயற்சி !

சம்பரதாய சடங்குகளுக்காக
கையில் தேனீர் கோப்பை
வாழைக்காய் பலகாரம்
செயற்கை வெட்கம்
சங்கடத்துடன் அவள் ...

வந்தார்கள் பார்த்தார்கள்
சென்றார்கள் ...

மௌனம் உடுத்திய சூழல்
மெதுவாய் உடைகிறது
அவளின் பொய் புன்னகையில்
இவையனைத்தும்
கடிதத்தில் தெரிவிக்கின்றோம்
என்ற பதிலுக்காக ...

அவளும் மழையும் ...

கண்களுக்குள் மின்னலாய்
உட்சென்றவள் இதயத்தில்
இடியாய் இறங்கிவிட்டாள்

காதல் மழை பொழியும்
தருவாயில் காற்றினில்
கலைந்த மேகம் போல்

நிஜங்களை கரைத்துவிட்டு
நினைவுகளை அசைபோட
கற்றுக் கொடுத்தவளுக்கு
தெரிய வாய்ப்பில்லை ...

வானம் பார்த்த பூமியின்
ஏக்கமும் ஏமாற்றமும்
அவளிடம் சினம் பூண்டு
மேலும் ரணம் கொள்ளவில்லை ...

அவளை வெறுக்கவுமில்லை...ஆனால்
விரும்புவதை தவிர்க்கிறேன்
என்னிடம் அவள் அதனையே
விரும்புவதால்...

ஆனாலும் ரசிக்கிறேன்

என்னவென்று தெரியவில்லை
ஏனென்றும் புரியவில்லை
எனை அறியாமல் சிரிக்கின்றேன்

சோப்புக்கட்டி கரைய குளிக்கிறேன்
சுடிதாரை பலமுறை மாற்றுகிறேன்
நெற்றிப்பொட்டை சிரிதாக்குகிறேன்
நொடிக்கொருமுறை முகம் பார்கிறேன்

வெட்கத்தால் சிவந்தது நான் மட்டும் அல்ல
என் வீட்டு கண்ணாடியும் தான்...இன்று
என் காதலனாய் உன்னை சந்திப்பதால்.....

இது காதலின் மொழியா அன்றில்
வெட்கத்தின் இலக்கணமா புரியவில்லை
ஆனாலும் ரசிக்கிறேன் எனை மறந்து
என் முகத்தில் பருக்கள் ...